සංචාරක ඉන්දීය කණ්ඩායම සහ ශ්රී ලංකා කණ්ඩායම අතර පැවැත්වෙන තරග දෙකකින් සමන්විත ටෙස්ට් තරගාවලියේ පළමු තරගය අද ගාල්ල ජාත්යන්තර ක්රිකට් ක්රීඩාංගණයේදී ආරම්භ වීමට නියමිතයි.
මෙම තරගය දෙපිළටම සුවිශේෂී ඓතිහාසික කඩඉම් කිහිපයක් සනිටුහන් කරනු ලබනවා.
ඒ අනුව මෙය ඉන්දීය ක්රිකට් ඉතිහාසයේ ඔවුන් මුහුණ දෙන 600 වන ටෙස්ට් තරගය වන අතර, ගාල්ල ජාත්යන්තර ක්රිකට් ක්රීඩාංගණයේ පැවැත්වෙන 50 වන ටෙස්ට් තරගය ද වනවා.
ලෝක ටෙස්ට් ශූරතාවලියේ ප්රසාද ලකුණු ලබාගැනීම වෙනුවෙන් දෙපිළටම මෙම තරගාවලිය අතිශය තීරණාත්මකයි.
තරගාවලියේදී ශ්රී ලංකා කණ්ඩායම ධනංජය ද සිල්වා විසින් මෙහෙයවනු ලබන අතර, ඉන්දීය කණ්ඩායම මෙහෙයවනු ලබන්නේ ශුබ්මන් ගිල් විසිනුයි.
ආබාධ තත්ත්වයන් හේතුවෙන් ශ්රී ලංකා පිලේ පැතුම් නිස්සංක සහ කුසල් මෙන්ඩිස් මෙම තරගයට ක්රීඩා නොකරන අතර, ඉන්දීය පිලේ ප්රබල වේගපන්දු යවන්නා වන ජස්ප්රිට් බුම්රා ද ආබාධයක් හේතුවෙන් තරගාවලියෙන් ඉවත් වී තිබෙනවා.
කෙසේ වෙතත්, තරගය පැවැත්වෙන දින කිහිපය තුළ ගාල්ල ප්රදේශයට වැසි සහිත කාලගුණ තත්ත්වයක් ඇතිවීමේ හැකියාවක් පවතින බවයි කාලගුණ අනාවැකි මඟින් පෙන්වා දී ඇත්තේ.
