දියතලාව, “ෆොක්ස්හිල් සුපර්ක්‍රොස්” මෝටර් රථ ධාවන තරඟය අතරතුරදී සිදු වූ අනතුර සම්බන්ධයෙන් පුද්ගලයන් දෙදෙනෙකු පොලීසිය විසින් අත්අඩංගුවට ගෙන තිබෙනවා.
පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව පැවසුවේ අනතුරට ලක් වූ මෝටර් රථ 02ක් පැදවූ තරඟකරුවන් දෙදෙනෙකු එලෙස අත්අඩංගුවට ගත් බවයි.
අනතුරෙන් ඔවුන් දෙදෙනාද තුවාල ලබා තිබෙනවා.
ඒ අනුව දියතලාව රෝහලේ ප්‍රතිකාර ලබමින් සිටියදී ඔවුන් දෙදෙනා අත්අඩංගුවට ගත් බවත් පොලිස් ආරක්ෂාව යටතේ තවදුරටත් ඔවුන් ප්‍රතිකාර ලබන බවත් පොලිස් මාධ්‍ය ප්‍රකාශකවරයා පැවසුවා.
අනතුර සම්බන්ධයෙන් තවදුරටත් පොලිස් විමර්ශන ක්‍රියාත්මකයි.
“ෆොක්ස්හිල් සුපර්ක්‍රොස්” මෝටර් රථ ධාවන තරඟාවලිය මෙවර පැවැත්වුනේ වසර 05කට පමණ පසුවයි.
දියතලාව නරියාකන්ද ධාවන පථයේ ඊයේ සිදුවූ මෙම අනතුරෙන් පුද්ගලයන් 07 දෙනෙකු මිය ගියා.
එලෙස මිය ගිය පිරිස අතර වැලිමඩ ඩයබරාවත්ත ප්‍රදේශයේ පදිංචිව සිටි වයස අවුරුදු 08ක් වූ දැරියක්ද වන බවයි පොලීසිය පැවසුවේ.
එම අනතුරෙන් ජීවිතක්ෂයට පත්ව ඇති සෙසු පිරිස පිරිමි පුද්ගලයන් වනවා.
කොස්ගම සාලාව කඳවුරට අනියුක්තව රාජකාරී කළ අවිස්සාවේල්ල තල්දූව ප්‍රදේශයේ පදිංචි යුධ හමුදා සෙබළෙක්ද ඒ අතරට අයත්.
එම සෙබළා නිවාඩු ලබා මෙම මෝටර් රථ ධාවන තරඟය නැරඹීමට පැමිණ තිබෙනවා.
අනතුරෙන් ජීවිතක්ෂයට පත්ව ඇති සෙසු පුද්ගලයින් වැලිමඩ - ඩයබරාවත්ත, සීදූව - රාජපක්ෂපුර, මාතර රාහුල පාර, අකුරැස්ස - වලව්වත්ත සහ මාතර - ගොඩගම ප්‍රදේශවල පදිංචිකරුවන් බවයි පොලීසිය පැවසුවේ.
අනතුරෙන් තුවාල ලැබූ පුද්ගලයින් 16 දෙනෙකු දියතලාව රෝහලේ සහ තවත් පුද්ගලයින් තිදෙනෙකු බදුල්ල ශික්ෂණ රෝහලේ ප්‍රතිකාර ලබනවා.
“ෆොක්ස්හිල් සුපර්ක්‍රොස්” මෝටර් රථ ධාවන තරඟය අතරතුරදී මෙම අනතුර සිදුවූයේ සංවිධායක මණ්ඩලයේ සහ තරඟ තීරකවරුන්ගේ වරදින් බවටද චෝදනා එල්ල වනවා.
අනතුර සියැසින් දුටු පුද්ගලයකු නෙත් නිවුස් වෙත කියා සිටියේ පළමු මෝටර් රථය ධාවන පථය තුළ අනතුරට ලක්වීමත් සමඟ එම ස්ථානයේ අධික ලෙස දූවිලි ස්වභාවයක් දක්නට ලැබුනු බවයි.
ඒ සම්බන්ධයෙන් තරඟ තීරකවරු අවධානය යොමු නොකිරීම හේතුවෙන් දෙවන මෝටර් රථයත් ධාවන පථය තුළ අනතුරට ලක්වූ බවද ඔහු කියා සිටියා.
එමෙන්ම අනතුර සිදුවූ අවස්ථාවේදී මෝටර් රථ ධාවකයන්ගේ සහයකයන් තරඟය නතර කරන ලෙස ට්‍රැක් මාෂල්වරුන්ගෙන් ඉල්ලීමක් සිදුකළද ඔවුන් එය ප්‍රතික්ෂේප කළ බවයි එම පුද්ගලයා පැවසුවේ.
අනතුර සිදුවීමෙන් අනතුරුව එම තරඟාවලියේ ඉතිරි තරඟ නතර කිරීමට සංවිධායකයින් පියවර ගනු ලැබුවා.
මේ අතර “ෆොක්ස්හිල් සුපර්ක්‍රොස්” මෝටර් රථ ධාවන තරඟය අතරතුර සිදු වූ මෙම අනතුර සම්බන්ධයෙන් විශේෂ පරීක්ෂණයක් ආරම්භ කළ බව යුධ හමුදාවද ප්‍රකාශ කළා.
